這天（16日）第七場二班1000米直路賽中華游樂會挑戰盃，又係雷神莫雷拉贏馬，佢憑上季最佳新馬獎得主「首映」報捷，幫頭號戰友蔡約翰馬房敲響今季勝鼓，單Win及組合獨贏A1分別派31.5及20元。
今場開跑前，蔡約翰季內只獲兩亞上名紀錄，堂堂應屆冠軍練馬師開局成績認真麻麻。
卒之跑到第五個賽日的第七場中華游樂會挑戰盃，現年4歲的上季最佳新馬「首映」幫到廐主打破缺口，排12檔沿途貼外欄帶放，放到離行離列，末段保持勁勢贏1.25馬位，阿蔡開齋仲有盃捧，可謂雙喜臨門。今次同時係蔡廐由前練馬師伍碧權之子伍鵬志出任副練以來，首度勝出頭馬，亦算別有一番意義。
「首映」呢匹大熱門首勝二班賽，帶挈馬主忠信賽馬團體除了頭馬獎金106萬元外，還拎到75萬元優異成績特別獎金。而雷神輕輕鬆鬆拎到個人全日第四捷，四匹頭馬是「鑽之友」、「大步走」、「鑽飾傳奇」及「首映」。
第七場幾乎開蔡約翰與羅富全師徒Q，羅富全以曾屬蔡廐的「鄉村輝煌」跑第三，僅影相不敵蘇保羅賽駒「一哥」，「一哥」力拼跑第二，第四名為摩廐「花月流星」，四重彩派近五萬元。