今季有兩位新練馬師，一是蔡約翰馬房前副練羅富全，另一位則是澳洲過江龍麥菲文。
羅富全開鑼日（3日）只派「銘記心中」一駒上陣即開齋，上期（10日）日馬更起孖，氣勢如虹。相反麥菲文暫時際遇麻麻，未開齋不特止，早前馬房更發生行馬機意外，導致9駒1死8傷，倉主當然希望盡快贏馬，以一振馬房士氣。
在香港想贏馬有乜好辦法？相信唔少廐主都認同，最簡單就是搵冠軍騎師雷神莫雷拉幫手。嚟緊周三（20日）快活谷夜馬四班1650米第二組，麥菲文的「有智者」便會強配雷神。
此駒亦有晒搏殺動態，剛周五（15日）朝早，麥菲文特登行去機坪，原來為了等雷神收工，兩人傾咗好耐，相信話題正是研究「有智者」的出擊大計。
「有智者」雷神騎過6次得3冠1亞1殿1第五，人馬最夾，明年元旦日便轉8歲，雷神仍肯騎，無非因為日前由雷神試谷草大閘後上強勁得第三走勢佳，雷神明知此駒戰鬥力仍在高位，當然食得唔好嘥啦！