都係嗰句又係莫雷拉贏馬！
雷神這天（16日）頭八場四捷後，第九場三班1000米直路賽，騎全日最熱獨贏馬，蘇偉賢馬房的「同得福」，結果後上再下一城，雷神取得個人第五Win，「同得福」開鑼日贏完匆出再贏，成為今季首匹連捷馬，今場單Win及組合獨贏A1分別派16.5及13.5元。
自2013年尾在港策騎以來，莫雷拉連同今日已累積15次一日五捷或以上，成就出一項香港馬壇新紀錄，而今日他五匹頭馬是「鑽之友」、「大步走」、「鑽飾傳奇」、「首映」及「同得福」。
講番4歲之「同得福」，上仗開鑼日服役初出即勝四班直路賽，獨贏有4.8倍，呢次跑高一班少負九磅，得番1.65倍，沿途守第四位，末段看似追不到放頭之「美麗皇牌」，勝利無望之際，偏偏步步輸一步贏，觸線一刻影相叮贏「美麗皇牌」，令「同得福」保持不敗之身。可能雷神都唔信自己咁好運，賽後他不停仰天傻笑，並無因自己贏馬太多而麻木。
相反潘頓就俾雷神搞死，第七場騎「一哥」輸俾雷神的「首映」捧唔到盃，今場潘頓的「美麗皇牌」再一次受制於雷神做二奶，潘頓維持整日僅贏頭場「幸福加數」一駒。
第九場9.3倍「美麗皇牌」跑第二；全場最冷225倍「新疆紡」跑第三，鞍上人吳嘉晉季內首度上名；8.9倍「多紅利」得第四，四重彩派七萬七千幾。