通訊事務前總監利敏貞早前升呢做商經局常秘。噚日就喺灣仔陶源酒家舉辦歡送會，筵開四席。但八方收到消息，話所有通訊辦同事都被勸出席，仲要夾成400蚊，唔少同事都好不滿。八方去酒樓了解過，發現一樓貴賓廳出面貼住利小姐嘅名牌，近房門嘅「接待處」仲放住張疑似用嚟簽到嘅表格。
房門出面貼住菜單，每席盛惠3,980蚊，包括碧綠炒元貝蚌仁、龍脷葉煲豬展、葱油文昌雞同鮑汁荷葉飯等菜式。唔少同事中午12點半就到場，身穿深色碎花裙嘅利敏貞就廿分鐘後先到，一落車就有女職員恭迎佢上酒樓。兩點食完約10名職員「護送」利敏貞落樓，仲緊張到即刻擋住八方㖭。
至於邊個埋單？通訊辦話利敏貞係應同事邀請出席午宴，員工自願參加同畀錢嘅私人聚會，而被指係強制性參加就係冇事實根據同失實嘅指控喎。