民主黨劉慧卿離開議會後，生活多姿多采，除咗不時搵人食飯之外，仲喺政圈好活躍。卿姐前日喺fb上載佢26年前當選立法局議員舊相外，八方仲聽聞，卿姐仲請特首林鄭月娥做網台節目《議會內外》嘉賓，成事嘅話將會係卿姐首度訪問在任特首。
短訊追林鄭未有回音
原來前日對卿姐嚟講係相當有意義嘅一日，因為26年前嘅1991年，香港舉行咗第一次嘅立法局地區直選，當年卿姐首次落場就成功當選，成為唯一一位直選出身嘅女議員，此後卿姐更未嘗敗仗，連續做咗7屆議員，絕對係一個輝煌嘅紀錄，所以卿姐噚日特別喺fb上載幾張當年選舉嘅fit爆舊相，紀念呢個咁特別日子。
卿姐雖然唔再做議員，但佢個做網台政治節目就越做越開心，卿姐噚日同八方證實，佢前排邀請過林鄭上《議會內外》，林鄭冇拒絕仲話OK，只係遲啲先。卿姐上周再短訊追吓林鄭幾時有時間，但就未有回應。
其實卿姐喺梁振英做緊特首嘅時候都請過佢，只係689一直冇回音而冇成事。不過八方估林鄭冇咁快答到卿姐，因為佢噚日仲喺緬甸訪問，仲同緬甸國務資政昂山素姬見面，林鄭仲送咗一幅由著名攝影師Steve McCurry拍攝同親筆簽名嘅昂山素姬相畀對方，之後林鄭又會同貿發局去英國訪問，就算佢肯去卿姐節目，怕且冇咁快得閒。
李八方
