前特首曾蔭權因公職人員行為失當被判入獄，今年4月底獲准保釋等候上訴，將會係呢個月26日開審，暫時回復自由身嘅曾蔭權，噚日傍晚着住西裝、配上藍白色袋巾，同佢細佬、警隊前一哥曾蔭培一齊現身中環皇后大道中，佢哋兩個人一頭白髮，急步而行，保鑣就負責殿後。
八方見煲呔孭住背囊，神情輕鬆，一邊同戴住口罩嘅曾蔭培講嘢，似乎好趕時間嘅兩兄弟走入豐盛創建大廈。
一入到去，大哥煲呔一支箭咁走上扶手電梯，上一樓大堂轉乘升降機，呢個時候保鑣發現有記者，即時表現得非常緊張，本來神情輕鬆嘅煲呔亦變得凝重，到兩兄弟上樓之後，大廈保安仲特登落番地下巡一圈，確保記者已經離開。