手機App公司Pokeguide公開指控港鐵MTR Mobile抄佢哋嘅構思，事件轟動初創業界。網民連日食花生，有人狂鬧港鐵，但亦有業界人士指Pokeguide只係抽水。Pokeguide噚日再喺fb發聲明，對港鐵係咪抄襲，立場明顯笠水。Pokeguide承認有關技術唔係佢哋獨家首創，而從來着眼點都唔係控訴港鐵App抄自己，而係想講點解咁多個App做緊，港鐵仲要浪費千萬再做相同嘅功能。對於Pokeguide嘅新聲明，港鐵只係再重申早在2013年已開始研究有關技術，亦接觸過唔同機構，詳細考慮過唔同方案利弊後決定自行開發新功能。睇完兩方面回應，相信呢場抄襲鬧劇都應該係時候落幕。