隔牆有耳：
55年麗香園結業　茶客趕道別 - 李八方

位於佐敦嘅麗香園噚日結業，為55年歷史畫上句號。唔少茶客到場道別，老闆B哥楊漢源話每個茶客都係老友記，「我做咗三代茶客，一入到嚟就知佢飲咩、知佢坐邊」。但68歲嘅佢覺得係時候退休，所以決定結業，「連舖都賣埋，如果唔賣我又唔捨得唔做啦」。佢話班夥計打算喺對面另起爐灶，到時會幫手做顧問。

麗香園以咖央多士同樽仔奶茶聞名。幫襯咗成40年嘅陸小姐，移咗民都要每年返港飲麗香園嘅奶茶，「一班街坊真係好有感情，佢杯奶茶第二度飲唔到，突然話唔做，好唔捨得」。老茶客楊生自稱係B哥嘅契細佬，佢話以前俾朋友帶嚟，點知一嚟就40年，仲半開玩笑話暗戀過B哥細妹，「問過老細佢個妹鍾意咩類型嘅男仔，𠵱家都做咗人阿嫲」。原本在外公幹嘅佢話，唔捨得多年嘅聚腳地，「大家都好好玩，外面搵唔番」。