天災威力可以好得人驚，颶風艾爾瑪近日登陸美國之後，造成唔少人命傷亡同埋房屋被摧毀，但原來艾爾瑪喺登陸之前已經橫掃過加勒比海島國安提瓜和巴布達，巴布達當地95%嘅建築物都畀個風摧毀。不幸嘅係祖家位於當地嘅前英格蘭國腳希斯基嘅親戚，至今仲未搵得番。憂心嘅希斯基都只能夠話：「我哋冇嘢做得到。」
95%建築物俾風災摧毀
要解釋災情係點，先要了解下安提瓜和巴布達呢個國家係點。其實佢哋係南美洲同美國之間嘅加勒比海N咁多個島國嘅其中一個， 而安提瓜同埋巴布達就分開兩個島嘅，今次災情就集中喺較為北方嘅巴布達，首相布朗尼（Gaston Browne）講到明，當地有95%建築物畀風災摧毀，直情形容嗰個島「接近冇人可以居住」。
39歲嘅希斯基雖然喺英格蘭出世，亦都曾經62次代表三獅軍，踢過兩屆世界盃同埋一屆歐國盃，不過其實佢祖籍係安提瓜和巴布達，父母同親戚都仲住喺當地。希斯基接受《BBC》訪問時就話，父母因為住喺安提瓜嗰邊，所以好彩生命安全冇問題，不過佢啲親戚就冇咁好彩，自從風災之後已經失去聯絡。
身處英國嘅希斯基，除咗等消息外惟有捐錢支持幫助災民嘅基金，不過傷上加傷嘅係，有另一個颶風𠵱家正循同一條路線進襲呢個島國，希斯基都話：「我哋唔可以承諾啲咩，亦都唔知之後嘅破壞會嚴重成點，同埋最終救援開支要幾多。」