渣打呢兩年積極翻身，全球落實瘦身大計，淨係香港區前前後後都裁咗過百人。不過，生意始終都係要人搵嘅，尤其係富戶生意，一個唔止頂十個喇。所以專做高端客生意嘅私人銀行人手反而無減，渣打仲好落力向其他大行挖角㖭！
由舊年第四季至今，渣打大中華同北亞區私銀原來已經增聘超過50人，唔少仲係經驗豐富嘅私人銀行家。好似吳惠義同柯瑞棻，就剛剛加盟做市場主管同董事總經理，會向大中華及北亞區私人銀行主管陳盧鳳儀滙報。
吳惠義之前出任開滙豐私人銀行大中華區董事總經理和主管，喺私銀同商業銀行有超過27年經驗，仲做過瑞銀同瑞信等大行。而柯瑞棻之前就係德銀董事總經理及大中華團隊主管，係美林同瑞士寶盛等多間國際大行已經工作超過22年，睇嚟今次渣打挖角都好出力。
李華華