投資L去完台北聽音樂會回來，閱報得知建制派大力聲討港獨，痛罵中大及教育大學生，吃午飯時叫左丁山講解俾佢聽。聽完，投資L話：「教大民主牆出現嗰張大字報，確有辱大學生身份，人地有喪子之痛，學生點可以冇品到去恭喜人？呢樣不成體統，抵鬧，但又有傳一啲校長竟然聲言以後永不錄用教育大學畢業生，咪即係誅九族？一人犯事，點解要其他同學綑綁式受害，呢啲校長頭腦有問題，好冇邏輯啫。」究竟係唔係教大學生犯錯，至今尚未完全清楚，因為教大CCTV錄影帶本是校方機密證據之一，唔知點解，以第一時間洩漏出外，上晒網，有心網民發動人肉搜尋，聲稱貼大字報人士係「校外人士」，港大SPACE兼職講師咁講，若然是真的，張仁良校長就慘咯，俾外人嫁禍呀！
至於前中大學生會會長周竪峰受內地生包圍激烈對罵，大講粗口之事，投資L別有睇法：「呢位同學明知有人公開錄影之下大講粗口，梗係吃虧啦，正儍仔！但講粗口我唔覺得點樣，三十幾年前我住Ricci（港大利瑪竇堂），宿舍內粗口滿天飛，西環咕哩不外如是，但出到嚟，梗係收口啦。我覺得最奇怪嘅係，呢位阿哥講粗口只係形式，但佢嘅講話內容似乎對中共及內地人充滿憎恨，20歲仔啫啩？1997出世，與回歸後香港一起成長，點解會咁討厭大陸？受過乜嘢刺激呢？還是香港特區中小學教育產生呢個效果呢？」
投資L問得好，左丁山與飯局在座人士，一時之間都搵唔到可以充份解釋點解整整一代（1997以後出生嘅青少年人），對中國歷史唔多認識，對國共內戰唔識，對文化大革命一無所知，對八九天安門事件冇興趣了解嘅新一代，何解會大多數鍾意去日本，同時唔願意返內地旅行？一位年輕OL對左丁山講，佢嘅朋友經常講「支那人」一詞，絲毫唔覺得有乜冒犯，令左丁山大吃一驚。呢呢，新一代嘅教育，係四十五到五十五歲人士嘅責任，左丁山已經係阿爺嗰代，照計唔關我地一代事啩？香港中年一代在家裏，在學校，點樣教導子女，灌輸知識，令到佢地討厭大陸，繼而反共嘅呢？教育大學呂大樂教授研究香港世代變遷，甚有權威，唔知呂大樂教授對此有何高見？呢20年來嘅教育制度及課程，係董建華、李國章、羅范椒芬在任時建立嘅，佢地有冇反思吓呀？