娥特7.1上任後，因為一啲翻新工程，未有即時入住禮賓府，但原來上月底已經悄悄遷居。呢位首位禮賓府女主人，7月底曾經被發現去買床單同枕頭，似乎都係為搬入新屋做準備。但相信大家更關注禮賓府係咪夠廁紙，好使呢位女特首唔使漏夜搭的士去便利店購置？至於第一先生林兆波，可能只係想要一片小天地，晾到佢嘅純情白襪仔。
真身同「2.0」拍住上
雖則冇高調擺入伙酒，但林鄭日前搵嚟有「林鄭2.0」稱號嘅特首辦常任秘書長丁葉燕薇陪同，邀請百幾個加入咗18區青年網絡嘅後生仔到府上傾偈。林鄭喺fb透露，席間交流氣氛熱烈，大家都踴躍就「三業三政（學業、事業、置業；議政、論政、參政）」發言。林鄭發佈嘅片段中，話特區政府非常重視香港青年，指呢次係一個「議政論政」嘅機會，叫年輕人問佢問題或分享睇法，唔知有冇人問娥特點睇最近一班被判刑嘅年輕人？
林鄭早前搞完呢個housewarming後，噚日就進行上任兩個月內第7次外訪去緬甸訪問，出發前先同中國首席大法官、最高人民法院院長周強會面，會後更一齊見證律政司長袁國強與最高人民法院副院長李少平簽署《關於加強最高人民法院與香港特別行政區政府律政司交流與合作紀要》，話相信雙方會進一步優化兩地司法同法律界交流合作喎。
李八方