戴耀明喺無綫有「御用儍仔」之稱，曾經喺劇集《EU超時任務》「動L」出位，現實中佢都有個女神，就係03年合作拍《金枝慾孽》嘅佘詩曼，有傳佢試過飲醉酒send短訊示愛，又話搵到錢要娶阿佘做老婆。今年初，戴耀明同拍拖五年嘅女友分手，感情空虛，前日佢接受傳媒訪問表示：「童話故事只會喺劇集裏出現，兩個人相處，唔係淨係話好鍾意就得，有時位置太遠，一定會有好大壓力。」
距離十萬億遠
至於夢中情人阿佘，戴耀明哈哈大笑：「我哋係好朋友，呢啲係講笑嘅說話，我哋嘅距離係十萬億咁遠，望吓就夠！不過阿佘真係好正，有時比男人仲男人，但係有時佢又好女人，性格又爽直，佢真係數一數二嘅珍品。」
雖然感情失意，但喺圈中默默耕耘25年嘅戴耀明，今年終於有機會北上賺人仔，擔正做《爆裂老婆三歲夫》嘅男一，出入有保母車兼私人助手照顧，獲尊稱為「戴老師」，拍一組戲等於喺香港兩、三個月人工，佢坦言：「始終上面有好多電視台，唔係好似香港得一間，變咗需求自然大，喺綠葉演員嚟講，我已經算平。」
撰文：馮仁昭
