距離萬聖節仲有個零月，海洋公園哈囉喂已經準備就緒，下月5至31日舉行，海洋公園副主席劉鳴煒噚日以黑巫師造型（圖）出席揭幕禮。Package男神似乎唔多慣做主持，介紹活動時口窒窒，佢話往年都有喺園內嚇人，今年亦唔例外，但保持神秘唔同大家講係邊日，又話上年嚇人時試過俾人認出，所以今年已同化妝師講要化得核突啲，相信到時有新look！
八方同一班行家好想知男神有冇試過帶女仔入鬼屋？但男神「黎明上身」派金句，話「朋友又好，敵人都好」，佢都願意帶佢入鬼屋玩；至於邊個係敵人？相信只有佢自己先知，而今年都有份拍廣告嘅前主席盛智文就話今年嘅鬼屋「Really scary」，名副其實「鬼都驚」！
海洋公園行政總裁李繩宗話，今年嘅哈囉喂規模係歷年最大，投資額亦較去年增加一成，相信入場人數同去年相若，即約一百萬人次，佢仲話睇到哈囉喂對韓國遊客有吸引力，未來亦會多向亞洲多國推廣。