歷來贏得歐聯冠軍次數最多嘅兩支球隊，皇家馬德里（圖）同AC米蘭，喺今夏組軍方向大不同。AC積弱幾年之後，今夏有錢喺手就盡情任性，花億幾歐元買人，夠換晒成個正選陣容。皇馬就突然唔玩巨星政策改為湊B，雖然部份收購都唔平，但大部份都係明日之星。兩隊喺季初同樣被高度睇好，但兩隊齊齊喺上輪聯賽吃悶棍失分，咁快見真章？
AC米蘭由季前歐霸外，一口氣連贏六場，到上輪意甲首敗仲要輸得大大鑊，1:4敗走拉素。隊波連勝緊嗰陣，唔少人大讚今夏買大量新兵買得好，之不過教練蒙迪拿真係想要咁多新球員，定係新老闆嘅主意，真係值得深思。蒙迪拿喺上季接手AC，球隊成績有改善，佢亦提攜咗唔少年輕球員，𠵱家球會塞一堆人畀佢其實真係唔知點算，好似文路爾盧卡迪利同阿利斯奧羅馬洛尼等意大利土炮小將，暫時都冇乜機會出場。蒙迪拿𠵱家手上有唔少好牌，信AC今季可以脫胎換骨一下子就變成爭標分子，其實係不切實際，不妨畀多啲時間佢去成長。
皇家馬德里喺季前完勝巴塞贏超級盃，一下子又被捧到天下無敵，點知最近兩場聯賽都和局失分。雖然係咁，但我始終認同球會今夏投資喺年輕球員嘅路線，上季尾段要兼顧西甲歐聯戰線，二線兵發揮極大作用，起步小小嘅挫折唔算係乜嘢。
文：何西