7.1上任後，奶媽特首林鄭月娥馬不停蹄，短短兩個月經已外訪10次，當然唔少都係北上。政府噚日公佈奶媽今日出發去緬甸訪問，唔知佢此行有冇機會同諾貝爾和平獎得主、緬甸國務資政昂山素姬見面呢？大家記得嘛，早前泰國外長敦巴穆威奈同林鄭會面時，引述有講法指亞洲有兩個女強人，除咗昂山素姬，另外一個就係林鄭，林鄭聽完都失笑。如果兩位亞洲「女強人」真係相見，確實幾值得關注。
政府話喎，奶媽呢次到訪緬甸係出席喺仰光舉行嘅第14屆世界華商大會，聽日就同緬甸政府高官會面，同時亦有參觀活動，17號凌晨就動身返港。政府話香港同東盟早前宣佈已完成咗自由貿易協定同相關《投資協定》嘅談判，而緬甸係林鄭繼8月初訪問新加坡同泰國後第三個訪問嘅東盟成員國，可見特區高度重視。