噚晚亞冠盃八強次回合，終於上演絕地反擊成功嘅戲碼。浦和紅鑽主場4:1反勝大半場打少個嘅川崎前鋒，合計反勝5:4晉級，殺入四強鬥上海上港。
首回合贏3:1嘅前鋒，19分鐘已經由艾辛奴費拉拿開紀錄，諗住坐定笠六啦，點知35分鐘興梠慎三追平，三分鐘後後衞車屋紳太郎因為舉腳過高踩到對手塊臉領紅牌。守到完場前廿分鐘，前鋒終於頂唔順，紅鑽由後備入替嘅隆比真歷、拿費爾達施華同埋高木俊幸分別喺70、84同85分鐘各入一球，喺全場多達26次射門下，終於反勝只得四次埋門嘅前鋒出線。
至於禮拜二廣州恒大同上海上港踢出一場峯迴路轉嘅經典戰，雖然加時後贏5:1嘅恒大互射12碼後出局，3,500萬人仔（約4,200萬港元）嘅絕地反勝晉級獎金就拎唔成，但係仲好多花生食呀。
據內媒《新浪體育》講，恒大班主許家印非常滿意球隊永不放棄嘅熱血同鬥志，所以賽後打畀球隊講明照拎1,000萬人仔出嚟派，希望恒大延續呢種團隊精神同埋拼勁。
保亞斯衰多口隨時停賽
上港教練保亞斯就嬲爆爆咁話「恒大主宰亞洲足協」，隨時被罰停賽兩至四場。點解咁躁？原來上港賽前幾日喺訓練場一直冇熱水用，而且球隊去球場時有成五單輕微車禍，最離奇係同一車牌嘅車一路「護航」，幾經辛苦先去到球場，點知客隊更衣室都係壞冷氣，所以上港就咁大怨氣嘞。