新一季歐聯分組賽周二開打，估唔到清一色上演強隊大數對手盛宴。重返歐聯嘅曼聯嘅主場3:0輕取巴素利，不過就損失大將保羅普巴，傷出至少休戰兩星期。其他勁旅車路士、巴黎聖日耳門（PSG）同拜仁慕尼黑齊齊大勝，連巴塞隆拿對住祖雲達斯都送對手三蛋，總之上盤客全部盤滿鉢滿贏到笑。
前世界轉會費紀錄保持者普巴，今場獲領隊摩連奴高度睇重，戴上隊長臂章上陣，不過踢咗19分鐘就因為拉傷大腿退下火線，英媒估計佢要休戰至少兩星期，但仍然有待詳細檢查之後確定。
大勝3:0摩佬都鬧唔認真
不過摩佬都唔使太頭痕，佢手頭上正正係高佬夠多，入替普巴嘅比利時爆炸頭費蘭尼；及喺35同84分鐘，分別由盧卡古同拉舒福特各入一球，造就紅魔大勝3:0。值得一提嘅係，呢場係拉舒福特足球生涯第一場歐聯比賽，呢位「地標王」之前喺歐霸盃、英超、英聯盃、英格蘭U21以至國家隊首次上陣都入波，今次連歐聯賽事都有進賬，認真犀利。
曼聯喺歐聯分組賽旗開得勝，不過摩連奴賽後就唔係十分滿意，賽後大發牢騷：「直到我哋領先2:0之前，成隊波都踢得好有信心。然後領先兩球之後就乜都變晒，踢起嚟完全唔認真，做嘅所有決定都係唔正確嘅。我哋幾乎令自己陷入險境，成隊波好似踢緊夢幻足球咁，似打緊PlayStation多過乜，我唔鍾意咁樣，踢得太花巧！呢啲完全係賭博一樣，踢波係要尊重對手。𠵱家係唔知得失球差會唔會成為呢個小組嘅出線關鍵，總之隊波係完全失去優勢同隊型，失埋啲好簡單嘅波，我真係好唔鍾意咁樣，班球員太放鬆喇！」那邊廂英國Playstation喺twitter回敬摩佬，話PS係娛樂大眾，唔會喺佢哋station泊大巴。
車仔出後備照炒新丁
姑勿論過程係點，贏波先係最重要。另一支喺周二歐聯登場嘅英超球隊贏得仲多，車路士派出部份副選主場6:0大勝。
周二歐聯幾乎係強隊天下，拜仁慕尼黑同PSG分別派對手三蛋同五蛋，祖雲達斯就慘啲，作客出戰近況大勇嘅巴塞隆拿輸0:3，總之追捧強隊上盤嘅，幾乎全部有斬穫。
