個人魅力呢家嘢唔係話想有就有，但話題馬「巴基之星」所擁有嘅魅力，相信就多到連佢自己都唔會想要。
好似早前只係因為釘甲釘瘀咗隻腳，而要停課五日咁啫，就已經受到媒體廣泛報道，質問匹馬健康係咪有問題。雖然練馬師告東尼話匹馬冇乜事，仲諗住計劃喺10月1日，復出跑三級賽慶典盃（1400米）㖭。
不過復出之路似乎無預期咁順利啦，睇翻晨課總表，喺9月4日之後，「巴基之星」又再一次於名單之列消失。
另外，「巴基之星」喺上季精英碟（三級賽1800米）起步不久罷跑，除咗罰咗雷神莫雷拉成皮嘢外，馬會其實都有罰埋「巴基之星」之後想出賽，要最少連續兩次試閘及格，而其中一次就要響1600米起步。不過上周五（8日）本來就有一次試閘可以報名，但「巴基之星」最終都係冇出現。
而距離復出之期日子越嚟越接近，閘未試好，晨課又斷下斷下，究竟「巴基之星」趕唔趕得切喺10月1日復出呢？而佢嘅健康係未又好似告仔咁講好小事呢？
如果最後結果喺國慶日唔跑，「巴基之星」會否連12月的國際賽都要避席呢？呢堆問題，相信只得告東尼一個人最清楚。