聲稱要以「革走戴耀廷為己任」嘅建制派立法會議員何君堯，上周聲言由佢發起嘅要求港大校委會辭退港大副教授兼佔中發起人戴耀廷嘅聯署行動有逾8萬個簽名，但承認數字可能誇張、重叠。大專學界近日大反擊，發起捍衞言論同學術自由嘅聯署聲明，邀各地學界人士聯署捍衞學術自由兼挺戴，簽名厲害之處係實名，避免有水份。真正讀書人果然有良心，行不改名、坐不改姓。
名為「捍衞言論及學術自由 支持良心學者戴耀廷」嘅聯署聲明，話憂慮何君堯嘅言行或已對港大或各大專院校教職員構成壓力，表示強烈憤慨，又認為何嘅相關言行不公、偏頗，予以譴責，聲明仲強調言論同埋學術自由係健康社會嘅基石，「法治」不單指守法，更要達致人權和公義。
陳家洛：讀書人要講真話
發起聯署抗敵嘅包括港大教授何式凝、浸大副教授陳家洛、科大副教授成名等，響應者當然唔少。
八方問過陳家洛，佢話發起聯署因為覺得社會要好好認識「院校自主」、「學術自由」、「讀書人的責任」呢幾個十分重要嘅課題，當院校承受壓力、學者受謾罵攻擊，甚至要院校解僱言行唔啱心水嘅人，絕對不能接受，亦都唔會袖手旁觀。陳家洛仲強調，今時今日嘅香港，絕對需要讀書人繼續講真話，身體力行參與社會事務。
李八方