人人一機在手嘅年代，個個希望處處有Wi-Fi。灣仔會展宣佈，委託香港寬頻為會展提升Wi-Fi網路系統工程，預計明年第三季完成。工程有乜咁巴閉？原來係會重新裝設先進Wi-Fi網絡系統，屆時會展會有多達660個Wi-Fi網絡接入點，並可同時支援超過兩萬部流動裝置，提供最高每秒達10Gb嘅傳輸速度，將來仲可以擴充。
整個工程耗資3,000萬，網絡系統係採用業界視為最高標準嘅802.11ac wave 2，提升後可以滿足大量訪客同時使用Wi-Fi上網，據知Wi-Fi網絡系統覆蓋超過134萬平方呎，包括6個展覽廳、兩個會議廳、52個會議室、兩個多用途廳、兩個演講廳、7間餐廳、大堂同埋所有公眾地方等，屆時去到會展唔怕上唔到網。