除咗娛樂同飲食業,麗新集團主席林建岳又有新搞作,佢噚日喺西班牙班拿貝球場同皇家馬德里足球會舉行聯合記招,宣佈麗豐控股會同足球會合作,喺籌劃中嘅珠海橫琴創新方二期項目內營建室內互動足球體驗中心,預計2021年落成,希望培育橫琴嘅體育娛樂文化。
用VR同AR模擬訓練
據知中心面積約達12,000平方米,會將體育、娛樂同高科技元素結合,以虛擬環境(VR)同擴增實境(AR)帶動唔同嘅模擬足球訓練體驗,等賓客恍如置身頂尖足球世界,試下做職業足球運動員。中心內仲設有皇家馬德里足球會歷史博物館以及不同嘅體育娛樂設施。