中西區區議會東華選區嘅居民又有機會投票嘞，因為原本嘅當區區議員民建聯蕭嘉怡轉跑道去做政務司司長嘅政治助理，出缺議席會補選。民主派決意爭返地盤，或會派出曾參加過兩次中西區區議會選舉、喺中西區大嘅名校女生伍凱欣（Bonnie）上陣。
陳方安生師妹
今年34歲嘅Bonnie喺名人搖籃嘅聖心畢業，係前政務司司長陳方安生、公民黨陳淑莊嘅師妹。Bonnie小學開始已經讀嘉諾撒聖心學校、中學就喺嘉諾撒聖心書院，讀足11年，中學時有玩女童軍同聖約翰救傷隊，都係外向開朗型。
雖然選過堅摩、水街兩區，但住過中西區多個地方嘅Bonnie嚟緊或會挑戰嘅東華選區先係佢真正長大、居住嘅地方，「我細個係住普慶坊……我住過中西區唔同嘅地方，當區區議員都係民主黨，包括阮品強、何俊麒、甘乃威」。
讀完副學士，Bonnie去搵工，首份工就係應徵民主黨嘅地區助理，當時2006年，負責見佢嘅係民主黨中西區資深區議員鄭麗琼，之後由甘乃威再見，最後做咗時任港島區立會議員李柱銘嘅地區助理。
Bonnie其後喺理大讀社會政策及行政學士，2009年畢業；做咗4年民主黨職員後，2010年喺民主黨風雨飄搖嘅日子入黨。2011年同2015年先後代黨出戰區選，高票落敗。嚟緊中西區區議會東華選區補選，有機會三戰民建聯，難怪Bonnie都話係宿命。