中西區兩個原區議員，包括山頂選區嘅自由黨陳浩濂同東華選區嘅民建聯蕭嘉怡，因為加入政府做政助，搞到兩個議席要補選。八方聽聞，兩區補選預料喺11月底舉行，聽聞最大機會係11月26日，下月初就會接受提名，睇嚟各位準備出戰嘅各陣營人士要準備就緒，兩區選民都要小心揀人。
八方問過選舉事務處，兩區補選係咪喺11月26日舉行？截稿前未有回覆。山頂區方面，聽聞自由黨打算派出楊哲安出戰；東華區方面，民主黨有意派出喺東華區長大嘅伍凱欣出戰。民建聯有冇人頂替？據聞至今未見有人蒲頭，消息指會由民記地區友好出戰，可能都要等埋西環指示。