特首林鄭月娥「好打得」呢個名，絕非浪得虛名，至少人人一日得嗰24粒鐘，佢就好似永遠有額外雙倍時間用，噚日由早到晚連走3場，休息兩個字，好似唔多可以應用喺佢身上。
一日走三場
佢朝早首先出席喺會展舉行嘅第二屆一帶一路高峯論壇致辭，都係讚吓香港可以為一帶一路帶來巨大貢獻；中午則喺香港×科技創業平台舉辦嘅青年科技創新創業論壇致辭，其間搞gag話自己「今天（噚日）係一個學生嚟交功課」，表明特區政府會大力推動科研發展。
傍晚則出席香港中華出入口商會國慶酒會，與前任特首梁振英同台，兩人仲並排而企，全程卻冇乜交流，唔知有啲乜因由？