現年45歲的南非騎師韋達開季成績認真一般，在近三個賽日全部座騎皆零上名（一至三名），最叻於剛周日（10日）沙田賽事第九場憑「一定賺」跑梗頸四，似乎勝利女神仲未想理佢，俾一個開齋機會；而另一位零上名騎師為上季得5W嘅吳嘉晉。
雖然近績麻麻，但係呢位十三屆冠軍騎師喺周三（13日）谷草夜賽嘅支持度又唔係話好差，全晚都有成五匹座騎係手。
今朝早（11日），十三少仲同出戰馬「肥仔」嘅廐主霍利時當面傾策略，有機會呢匹由同鄉訓練嘅賽駒，就係韋達今季開齋馬。
呢朝其實韋達有為「肥仔」跳兩段，晨課專家積奇表示粗壯馬循序操練已收身，毛色深潤，落腳整齊有力，心火轉旺，大閘省後狀態進展甚速。人馬將出戰周三晚第四場三班1000米賽事。