歐聯分組賽周二開打，英超創歷史有5支球隊角逐，除咗上季前四車路士、熱刺、曼城同利物浦外，歐霸盃冠軍曼聯亦獲得參賽資格。相反阿仙奴只得第5，連續19年領軍出戰歐聯走勢斷纜，只可以角逐歐霸盃。
英超球隊當中，首周分組賽最惡頂算得上係熱刺，因為佢哋編入死亡H組，首戰就主場對多蒙特；熱刺話就話主場，不過繼續喺溫布萊舉行，上屆歐聯已經主場不勝，分組賽出局，加上今季聯賽亦未主場開齋，對熱刺更不利係中場迪利阿里，因為上屆歐霸盃領紅，頭3場分組賽包括今仗需要停賽。
英超雙紅，「紅軍」利物浦同「紅魔鬼」曼聯，就重返歐聯賽場；紅軍自14/15球季再有歐聯參賽資格，不過上仗作客吞曼城5蛋，周三E組首戰主場對西維爾都唔算易應付。曼聯運氣就比較好，A組強隊唔多，周二主場面對瑞士嘅巴素利，就算剛剛聯賽俾史篤城逼和，連勝走勢告終，以摩連奴領軍能力，要打開分組勝利之門都冇乜問題。另外回勇嘅車路士，主場對卡拉巴克，曼城作客荷甲冠軍飛燕諾，三分都應該冇咩問題。
講歐聯，又點可以唔提西甲球隊，事關近4屆冠軍都係西甲兵，唔係皇家馬德里就係巴塞隆拿；巴塞第一輪就遇上強隊，要主場鬥祖雲達斯，好彩巴塞前鋒美斯繼續大勇，新兵奧士文尼迪比利亦貢獻助攻，上場聯賽大勝愛斯賓奴5:0，祖記上屆決賽大敗俾皇馬，今場就有克羅地亞前鋒文迪蘇傑上陣成疑。力圖3連霸嘅皇馬，就主場對塞浦路斯球隊尼科西亞。
歐聯首周分組賽秩序
星期二
A組：賓菲加vs莫斯科中央陸軍、曼聯vs巴素利
B組：拜仁慕尼黑vs安德列治、些路迪vs巴黎聖日耳門
C組：車路士vs卡拉巴克、羅馬vs馬德里體育會
D組：巴塞隆拿vs祖雲達斯、奧林比亞高斯vs士砵亭
星期三
E組：利物浦vs西維爾、馬里博爾vs莫斯科斯巴達
F組：飛燕諾vs曼城、薩克達vs拿玻里
G組：波圖vs比錫達斯、RB萊比錫vs摩納哥
H組：熱刺vs多蒙特、皇家馬德里vs尼科西亞