愛華頓前鋒朗尼早前因為醉駕被捕，車上仲有個疑係佢偷食對象嘅單親媽咪Laura Simpson，搞到大緊肚嘅老婆高蓮想離婚咁滯。英國傳媒就報道，朗尼為咗挽救呢段婚姻，已經發誓會減少去飲酒，但就要求高蓮都要少啲度假。
31歲嘅朗尼上星期醉駕畀人拉時，高蓮都係度緊假，朗尼出事之後佢即刻帶埋三個仔返英國娘家，曾經有報道話佢今次諗住離婚分朗尼身家。之後《太陽報》話高蓮決定畀多一次機會朗尼，條件係要老公少啲出去飲，但係朗尼都唔示弱，話︰「你可以唔度假，我可以唔去飲！」
據報道，朗尼不滿高蓮成日去度假，淨係過去一年都去咗10次。據悉高蓮向來鍾情巴巴多斯，但除咗意大利Lake Como、伊比薩島、拉斯維加斯同希臘嘅米克諾斯島，佢最近都好鍾意去馬德里、馬略卡、阿姆斯特丹同葡萄牙玩，至於朗尼上星期出事嗰陣，高蓮就係同三個仔喺西班牙馬略卡度緊假……又睇吓朗尼同高蓮會唔會為咗九年婚姻而一人讓一步啦！