唔少香港人係大嘥鬼，有啲物品用咗一陣就唔用，環保團體綠領行動特別舉辦「綠領奇兵 Amazing Greeners慈善賽」，以此推動港人生活環保啲。
賽事以城市定向形式進行，參賽者要根據提示卡按次序到設喺港島區嘅8個檢查站，完成唔同環保任務。至於係乜任務？八方當然唔可以洩露天機，但可以畀貼士，其中一個檢查站「菜菜園」就設喺工廠大廈天台，大家估唔估到有乜環保任務？
慈善賽分企業隊同公眾隊，企業隊3人為一組，籌款額需7,000元或以上，或以贊助形式組隊支持；公眾隊就兩人為一組，籌款額只需900元或以上，本月30日截止報名，綠領行動估計約150人參與，詳情可瀏覽： http://www.greeners-action.org/amazinggreeners 。