（晚上7時40分傷勢更新：黎海榮左手手腕骨折，肩膊亦受傷，至於他曾表示腰部以下位置很痛，仍需留院觀察檢查才可清楚真正情況。）
33歲華人騎師黎海榮今個馬季未開齋先墮馬！
呢位資深華將今日（10日）可謂禍不單行，先有上季由自己開齋的「君臨大地」在第八場田泰安胯下建功，只有戥人高興，繼而在第九場三班1200米墮馬受傷，被即時送入威爾斯親王醫院接受沿療，佢將唔會參加本周三（13日）谷草夜馬。
第九場黎海榮策騎沈集成馬房「育成寶貝」轉直路彎前出事，當時該駒突然失蹄前跪，黎海榮隨即失去重心，整個人完全脫離馬鞍只拉着韁繩，最終佢還是倒在地上，後面亦有馬匹跨過其身軀，黎海榮疑似被踢中，狀況相當危險。
據黎海榮落地後一度失去知覺，不久恢復意識可說話，隨即被直送去威爾斯醫院，其間佢向醫護人員表示感到腰部以下位置很痛，疑被其他馬踢中。
至於第九場三班1200米草地賽，頭馬是容天鵬馬房「平湖之星」，此駒在華人騎師梁家俊胯下沿途前置，大熱輕勝兩馬位，單Win及組合獨贏A1分別派22.5及15.5元，梁家俊告季內開齋，容天鵬則連續第二個賽日有馬贏。而今場「鐵胆王」力保一席亞軍；「豈得閒」與「一定賺」後上分別跑第三及第四。