《城市論壇》噚日唞暑後復播，焦點有幾個，嘉賓名單有睇頭，皆因青年新政游蕙禎同民主黨嘅新星法律界女神吳思諾兩位小花首度同場，吳思諾仲係首次「處女出戰」城市論壇，兩人令充斥維園阿哥阿伯嘅《城壇》，可觀性大為提高。加上另外兩位女嘉賓都係女將，包括民建聯荃灣區議員林琳同西貢區議員方國珊，四個女人圍住一個男主持蘇敬恆，場面即使唔係空前絕後，但一定係相當罕見。
陳月慧到場取經
游BB同吳思諾兩位小花席間合力反駁林琳呢位共同「敵人」，合作愉快。節目完結後，游BB話呀，真心覺得吳思諾幾靚女，並話自己同佢，市場唔同喎。咁有咩唔同？佢話留番畀大家去定義喇！游BB期間都記掛不斷喺《城壇》外面「問候」佢嘅伯伯，因為大熱天時要大嗌大喊，游BB都覺得伯伯都好慘：「陰功，入唔到場，要喺出面嗌，佢哋好辛苦。」
本身係大律師嘅吳思諾首登《城壇》，佢話只係有少少緊張，感覺OK，「上court（法庭）緊張啲」。佢話事前都有問過黨喺唔同事件嘅立場，但最終佢都係暢所欲言，強調自己真係做過功課，所以喺論壇上提出成立好似「青年議會」，規定政府要聆聽年輕人意見。而51歲嘅方國珊席間特別強調，覺得自己仲係青年。
除咗台上呢4位女士，台下有位靚女亦好吸睛，就係港台節目《早辰．早晨》主播陳月慧，據聞佢即將接替稍後料入熱廚房做政助嘅蘇敬恆擔任主持，難怪要到場取經，做好準備。至於蘇敬恆，續冇回應入政府嘅問題，話冇新消息同大家公佈。
李八方