隔牆有耳：
娥班子最多架己冷 - 李八方

林鄭埋班兩個幾月，班子合作似乎較上屆順暢，唔知同佢哋係邊度鄉下有冇關？八方姑且查一查，結果發現香港先後4位特首，兩個都係浙江舟山人，分別係首任董建華及首位女特首林鄭月娥。原來「佢都係我同鄉喎」，難怪阿董不停「董抱抱」撐奶媽。
至於三司十三局，依然潮州幫最人多勢眾，財爺陳茂波、商經局局長邱騰華同食衞局局長陳肇始都係「架己冷」。其實上屆政府都係潮州幫天下，除咗上述3位，食衞局前局長高永文都係潮州人。

三耳局長鄉下係溫泉鄉

而香港大部份人祖籍都係廣東一帶，所以官員要喺班子搵同鄉都唔難，律政司袁國強同教育局局長楊潤雄兩位都係東莞人、政務司司長張建宗同公務員事務局局長羅智光則係惠州人。順德人都有兩位，除咗環境局局長黃錦星，另一個就係民政局局長劉江華嘞。運房局局長陳帆祖籍湛江、勞福局局長羅致光則係三水人、發展局局長黃偉綸同保安局局長李家超，分別屬南海同番禺。而政制局局長聶德權嘅鄉下則係陳茂波都推介過去浸溫泉嘅恩平，唔知三耳局長有冇試過？
局長中亦有兩位外省人，創科局局長楊偉雄及財庫局局長劉怡翔分別係湖南同江蘇人。