講一帶一路國家，因為數目太多，要對每一個國家都有認識，並非易事，何況香港嘅大學過往研究外國，只係集中西方大國，對亞太區國家反為冇乜專家可言。最近左丁山遇到一位近年集中研究亞洲新興國家嘅經濟師，佢對左丁山講，目前最有潛力，無論人才、語言、土地以及勤力工作態度嘅新興市場，不是我地最熟悉嘅泰國，而是越南。最多人口嘅印尼因宗教及種族矛盾，近年不時前進三步，後退兩步，菲律賓人口近億，講英語，但每一個民選總統上場，都各有弱點，令外國投資者有疑慮。反而越南一黨專政，類似中國走「有越南特色的社會主義」，因曾受法國殖民統治及美國影響，改革經濟更加開放大膽，另外歷史上與中華文化有聯繫，華商到越南投資比較容易適應，所以越南已成為新興市場主力，有資格成為亞洲第五條小龍。
呢位經濟師話緬甸發展只在初階，有待觀察，越南鄰國柬埔寨最令人失望，畢竟呢個國家受赤柬毒害太深，軍人轉化為民選政府之後，舊習未除，濫權貪污裙帶盛行，高壓打擊反對派不遺餘力，全國了無生氣，雖然地價便宜，人工便宜，都難吸引外資。
近日閱報得知柬埔寨一張英文報紙The Cambodia Daily被政府追欠稅650萬美元，被迫停刊。天真人士可以話柬埔寨依法治國，報章逃稅，罪無可恕。其實在好多國家，追稅係一種政治高壓手段，政府對反對派看不順眼，一聲查賬追稅，包保搞到反對派諸事不靈。呢張柬埔寨日報被控自2006至2016年十年之間欠稅650萬美元，柬埔寨利得稅率係20%，賺到3250萬美元就要交稅650萬美元。柬埔寨人口不多，前法國殖民地缺英語傳統，英文報紙點可能賺到咁多錢？在東南亞，每一張英文報紙都銷路不高，艱苦經營，柬埔寨日報係一張小報，最弊係由美國人主理，不時披露政府貪污，營私舞弊等事情，咁就冇運行啦。這年頭，無論當地人或歐美作者，在當地英文報紙寫稿，都要知道老闆姓乜。前星期在南華早報睇Jake Van Der Kamp專欄，佢痛批中國大陸經濟靠舉債支撐，有如龐氏騙局！左丁山即刻感到不妙！唉，消息傳出，Jake會停筆咯喎，以後不再在南早出現，荷蘭裔作者唔識中國老闆姓乜？令人感嘆不已。