周日(10日)沙田賽事八草兩泥，將上演今季首次泥地賽，分別為第六場四班1200米及第十場三班1200米。
上季喺泥地1200米也文也武嘅低班版巴基之星「金地飛客」，仍未準備好上陣，冇報跑第六場四班同程，但「金地飛客」蹄下敗將「天皇巨星」就趁呢個黃金機會，喺第六場出擊。
「天皇巨星」上季兩度喺泥地1200米入Q，廐主高伯新養馬不多，急需搶攻，鬥志唔使擔心，只驚呢匹馬冇乜運，其騎師史卓豐仲點出此駒一個毛病，佢話：「『天皇巨星』性格幾細膽，有時喺陣上會怕馬，有時又會受周圍聲音影響，搞到自己好緊張，表現走晒樣，5月尾熱倒落第一役就係好例子。不過，上季佢只得3歲，情有可原，新季大咗一歲，競賽生涯亦步入黃金期，相信『天皇巨星』日益成長下會有唔同，變得大膽啲！」
如果「天皇巨星」今場擺脫二奶命，對馬主香港足球會團體嚟講便意義重大，事關此團體對上一次拉頭馬，已係09年3月隻「足球大師」，幕後一定恨贏恨到發燒。