藝術發燒友姬絲桃傳來一份美國Top 15（十五大）藝術學院，附註云：「今日在藝術界、設計界、藝術拍賣行業，如果你不是這十五間名校嘅畢業生，有MFA學位，你不會走得很遠！」讀書係有門戶之見嘅，名校出身，當然零舍唔同。呢15間名校，排頭位嘅係耶魯大學MFA課程，全美第一！耶魯噃，大名鼎鼎，藝術學院在美國有無可挑戰地位，第二名係紐約Bard College，第三名係瑪利蘭藝術學院Maryland Institute College of Art（王無邪母校），第五名係Cranbrook Academy of Art（陳育強母校），其他有Rhode Island School of Design（前南豐總經理，地產界知名人物蔡宏興母校），California Institute of the Arts（何慶基母校），UCLA，MIT，芝加哥（School of the Art Institute of Chicago）等等。
當今社會講求名氣及人脈關係，並非完全追求知識。當然，名氣學校之有名氣係因為有名師助陣，有名人入讀等等，當然係知識傳授嘅好地方。上星期六本地名氣小學──拔萃男校附屬小學（簡稱男拔附小）有入學講解大會，晨早就有家長排隊，報紙新聞報導話有近三千名家長到場，墟冚到極，三千名家長領取三千份小學一年級（2018年）報名表，有幾多學額呀？報導話：約150個，即係20人爭一個位，小一入學試冇筆試嘅，全憑面試，三千名五歲男童全部去面試，諗吓都戥校長及教職員辛苦，辛苦在花時間見小孩子之外，還要評分，評估，從中選出大約150名。入選嘅學生嘅家長，肯定高興過中六合彩二獎。姬絲桃對左丁山講：「男拔附小太有名氣，故此報紙大篇幅報導啫，其實其他名校一樣係咁，例如聖保羅男女附小。我嘅朋友啱啱生咗一個BB，已經第一時間去九龍灣一間國際學校報名，遲一個月去就會排在四百幾名後面嘅嘞！」左丁山一時糊塗，問清楚姬絲桃：「窩打老道有間小拔萃，歷史好耐，依家又有一間男拔附小，點樣分呀？兩間嘅學生都直升男拔？」姬絲桃話：「我啲朋友知得清楚過你，佢哋話小拔萃學生唔會直升男拔，但男拔附小就是可以直升，兩間小學有不同辦學團體」。女士家長對呢樣特別留意，佢地嘅消息靈通過左丁山好多。家長最大夢想就係男拔附小，升上男拔，考入耶魯，一世無憂。有冇呢啲人呢？有嘅，例如中大榮休教授，前副校長廖柏偉教授就係從男拔到普林斯頓，再入史丹福得經濟學博士學位，讀書過關如斬瓜切菜，我地凡人望塵莫及。