政制及內地事務局局長聶德權噚日結束訪問珠海、中山、深圳嘅行程，隨即爽手喺fb貼吓相，唱好幾句大灣區發展，交吓功課。八方不禁驚覺，新班子成員都幾鍾意返深圳喎！
遠嘅唔講，過去一個月。上月15號，保安局長李家超就率團去廣州同深圳兩日禮節性訪問，見吓廣東省公安廳、深圳市公安局等。唔夠兩日（17號），又到民政事務局長劉江華去深圳前海，探訪喺嗰度實習嘅香港青年人。局長去完輪到娥特。林鄭上月底就拖埋創科局長楊偉雄、商經局長邱騰華同埋聶德權去深圳，就話要為一個展覽開幕，同為前海深港創意產業園奠基。估唔到聶德權呢頭去完，嗰頭又再北上！