新鴻基地產近年積極推動運動行善，除咗一年一度ICC跑樓梯外，下月舉行嘅香港單車節亦都係年度盛事，賽事早前甫接受報名就迅速爆滿。
今年單車節新增國際專業公路繞圈賽，係本港首次主辦UCI 1.1級公路賽，至今已有10幾支國際勁旅報咗名。除咗呢啲單車好手，每年新地亦都有唔少員工參加單車節，有新地老友同八方講，今年報名情況更加踴躍，有500多名員工報咗名參賽，較上年多近100人。
八方位新地老友仲爆，新地員工之間原來仲有個WhatsApp group，交流踩單車心得。唔好睇班員工平時西裝骨骨，原來公司有好多員工都熱衷運動，呢位老友透露，佢識得一個管理層每日返工前都例牌先跑15至20公里，跑完就返公司沖涼準備一日嘅工作，風雨不改，咁有恒心，八方都好佩服。