港台王牌節目《城市論壇》7月唞暑前，唔少粉絲都好奇，會唔會係盛傳出任食物及衞生局局長政治助理嘅主持人蘇敬恆（蘇B）嘅告別作？八方噚日問過蘇B，知道城壇嚟緊周日（10日）復播時，佢將會繼續主持，探討年輕人嘅議政空間。至於幾時轉新工？蘇B只係笑住話：「如無新消息，會繼續主持（城壇）。」似乎要等政府正式宣佈，大家先知蘇B幾時主持最後一集《城壇》。
曾任職亞視有線
雖然蘇B離開港台嘅日子未定，但八方得悉，港台近日已經作好準備，搵來港台靚女主播備戰，就連蘇B都有親自教路，佢就係現為港台電視部女主持陳月慧。陳月慧過去主持經驗豐富，曾任職亞視、有線中國組等，近年轉職港台後，主要做《早辰．早晨》主持，曾與蘇B一齊主持節目，亦主持過2017年特首選舉嘅港台特備節目。
有曾經同陳月慧共事過嘅傳媒人話，陳月慧過去主持節目好淡定，亦有啲明星相，相信佢係現時香港電台電視部中，最有經驗嘅女主播。
八方聽聞，陳月慧為《城壇》接受特訓期間，其中一環係要訓練「獅吼功」，皆因佢平日主持節目時相當斯文，更加冇乜機會鬧人，未慣好似歷任《城壇》主持蘇B同謝志峰咁，喺台下觀眾失控時，大聲發言控制場面，但相信經過苦練後，主持《城壇》應該冇難度。