過去幫過唔少民主派猛人助選的民主黨游月華，噚日突然喺facebook上載一幅同法政匯思「新一代堅爆男神召集人」蔡麒嘅合照，仲附上圖話：「有人積極考慮參加補選，已開始部署，請各合資格選民密切留意政綱」，令唔少政壇中人都議論紛紛，莫非有新人加入補選戰圈？
蔡麒噚日接受八方查詢時，第一句已經笑住話：「我唔係選呀！」話其實只係同游月華等朋友傾過有乜潛在人士可能參加補選，講講吓游月華就推薦咗佢。蔡麒向八方好坦白咁講，至今冇正式考慮過要參加補選，又笑指唔覺得有人特別想投票畀佢。
游月華噚日就大讚蔡麒係一個好好嘅補選候選人，香港好需要咁高質嘅人參選，話未來會繼續鼓勵蔡麒參選，若然最終真係成事，佢願意為蔡麒出任選舉經理喎。