迷倒萬千少女熟女嘅公民黨黨魁楊岳橋，終於都封盤喇！岳少講過今年底會同女友Eve拉埋天窗，佢果然講得出、做得到。兩口子趁住立法會休會，低調去咗歐洲丹麥註冊。睇嚟八方都要改口叫岳少做岳爺喇。
岳爺同做事務律師嘅楊太向來都好低調，公眾場合甚少見兩人同場。不過今年初岳爺去挪威睇北極光嘅時候就成功求婚，之後佢透露過將會喺年底結婚。
議辦fb洩「蜜」
作為找數真漢子，岳爺提早兌現承諾，噚日就喺丹麥同Eve註冊。佢議辦嘅fb專頁「810扮工室」就率先爆料po楊生、楊太戴住婚戒嘅甜蜜合照（圖）。之後岳爺不甘示弱，「些牙」咗個po嘅同時，竄改咗香港著名愛情哲學家、運房局長陳帆嘅金句，變成：「選擇咗終身伴侶，就等於要放棄其他選擇。」曾經公開唔抵得岳爺同Eve拍拖嘅娥姐陳玉娥，怕且要死心喇！
八方梗係第一時間Telegram岳爺恭喜佢榮升人夫，順便問吓佢去邊度蜜月，岳爺原來已經計劃好，註冊完就喺丹麥同法國度蜜月，you are very romantic！造人大計方面岳爺話未有啦。咁又係，啱啱結婚梗係享受一下二人世界先。八方都喺度祝楊生、楊太百年好合、永結同心，出年記得派利是呀！
李八方