最近TVB電視劇《同盟》入面，講到有立法會議員勾結黑幫，八方原本冇乜留意呢啲電視劇，點知《同盟》劇情竟然辣㷫新同盟，搞到要公開澄清。
話說《同盟》近日劇情講到戲入面嘅黑幫家族頭領韋磊勾結立法會議員柳澤成（鄭子誠飾），同黑幫聯盟「同盟」成員話要另起爐灶，搞一個「新同盟」，新同盟召集人范國威，噚日就用真˙新同盟召集人名義發聲明澄清，話陸續收到街坊查詢，問戲入面嘅「新同盟」，係咪講佢哋新民主同盟？范國威話要對此作出三點嚴肅澄清：第一係柳澤成非新同盟成員，亦未曾同佢哋任何成員有接觸；第二係新民主同盟冇任何大財團贊助及支持；第三係新同盟支持提供大眾多元化電視選擇，叫市民除可以睇《同盟》外，仲可以考慮睇ViuTV、奇妙電視、港台電視，甚至去YouTube重溫亞洲電視節目！