美國駐港總領事唐偉康好似都靜咗一排，唔覺佢有咩活動咁。八方上去美領事fb一睇，原來佢上月底低調地去咗澳門，似乎入境澳門對佢嚟講冇乜難度。去到澳門做啲乜？梗係唔係望吓山、望吓海咁簡單喇，而係做啲相當有意義嘅事。
唐偉康喺上月30號，亦即係民主黨黃碧雲被拒入境澳門翌日，成功衝破澳門當局虛無飄渺嘅內部保安綱要法入境，連網民都對佢入到境嘖嘖稱奇。
唐偉康喺fb話，嗰日係美領事每月一次嘅美國公民服務日，所以佢去澳門拜訪吓當地嘅長者，又睇吓一班老人家打麻雀咁。
除咗喺澳門探長者，今個月初唐偉康出席完特首林鄭都有去嘅房屋論壇後，又落區幫有需要人士嘅屋企掃漆。就咁睇佢都髹得唔錯，手工幾好喎。