政府今年7月公佈智慧城市發展藍圖顧問報告，科學園同中大會合作設計智慧社區試點。科學園一連兩日舉行峯會，當中最有趣嘅係無人便利店同自動導航運送食品機，喺香港可以話係聞所未聞。
似航拍機 可夾實食物
美心食品同科研公司XDynamics合作，將無人機智能導航系統配合送餐服務，可以運送小薄餅、蛋糕仔等細型食品，成部機嘅外形近似航拍機，最大分別在於呢樣新研發係可以夾實食物，之不過美心暫時都未知幾時可以落實運作，但近年美心增加咗智能工具處理食品後，估計每年產量增加最少10%，強調無因而減省人手。
另一樣得意嘅新研發係24小時全自動便利店，店內完全冇店員，只需下載手機應用程式，手機一嘟就可以開門入便利店同買嘢，而每次只能畀一個人入去便利店；至於保安問題，只有貨櫃咁大嘅便利店，係就係見到有4個閉路電腦，但科研公司都話呀，有買嘢唔畀錢嘅可能性。現時期望6至8個月後會喺科技園開第一間全自動便利店，希望之後能夠陸續喺市區唔同地方再開店。