大家仲記唔記得荷西安歷基？呢位效力過利物浦、紐卡素嘅西班牙左後衞，自2016年回流西班牙效力薩拉戈薩，表現已不大如前；周三佢更加宣佈，因為長期傷患，決定退休，31歲就結束球員生涯。荷西安歷基雖然未為利物浦、紐卡素等球隊贏過主要錦標，亦都未嘗大國腳滋味，不過左路側擊力強，一度是紅軍主力。佢接受西班牙《馬卡報》訪問時，傷感咁講：「當2013年我接受完手術，以為3個月就可以復出，但最終休息2年，我搵過5個醫生幫助，都冇辦法徹底解決我嘅問題。我上季為薩拉戈薩上陣30場，每一次比賽完，膝蓋舊患部位，就腫到個波咁大，而且三日都冇辦法落床。我已經唔可以不依靠藥物繼續練習或者比賽，我好擔心自己40、50歲無法再行路，為咗未來人生，只可以放棄足球事業。」