中環摩天輪（圖）新舊營辦商經過接近一星期角力，終於喺噚日下午達成共識，令一度面臨清拆嘅摩天輪得以保留，唔少喺輪上留下愛的足印嘅小情侶，都好慶幸保留到愛的回憶。
八方問過獲邀介入斡旋嘅蘭桂坊集團主席盛智文，點解新舊營辦商最終攞到共識？佢話喎，雙方喺談判過程中確實面對巨大困難，但早前陷入膠着狀態，源於洽購過程中，買賣方律師均草擬咗相當強硬嘅交易合約條款，以維護己方客戶最大利益；當一方不滿條款時，就出動律師反擊，另一方態度就更趨強硬，自然令雙方角力白熱化。
呢位和事老話介入後，主要係不斷喺新舊營辦商及其律師之間作游說，先令佢哋回到談判桌，但由於係商業買賣，除非雙方肯透露價錢，否則巨輪售價無可奉告。