英國鏡報就為一眾有份喺過去一期踢國際賽嘅英超國腳做統計，睇下邊個係贏家，邊個係輸家；大輸家就係曼城嘅阿根廷前鋒阿古路，山長水遠由英國飛到南美為國效力，來回足足22,000公里，但國家隊連和2場，直接出線機會危危乎之餘，更連續2場坐冷板，完全冇出場機會。嚟緊周末英超重開，周六晚上7:45pm大戰曼城主場迎戰利物浦，睇下阿古路屈埋咁耐會唔會大爆發？
阿根廷由森柏奧利接任新教練後，前線組合亦都唔同，祖雲達斯前鋒希古恩被棄用，改由國際米蘭前鋒莫路伊卡迪，同祖雲達斯前鋒保羅戴巴拿同美斯合作，效果就認真麻麻；森帥變陣後，亦犧牲埋阿古路，連續2場冇機會出場，真係白白遊飛機河。曼城上輪英超贏般尼茅夫，阿古路都係做後備，餓波咁耐即管睇下佢會唔會喺對紅軍場大戰嚟料？
其他國際賽輸家，仲有法國中場保羅普巴、利物浦中場阿歷士張伯倫等。贏家方面，最大自然係利物浦翼鋒活特本，17歲仔已經幫威爾斯射入奠勝入球，另外德國連勝，奧斯爾交出入球兼助攻，阿仙奴都希望佢可以英超都咁生猛。