中國大力推動一帶一路概念，英文叫做The Belt and Road Initiative，上任香港特區政府特首梁振英念念不忘向中央獻功，將一帶一路掛在口邊，成日話香港要做一帶一路嘅超級聯繫人，其實嚴格嚟講，有咗網上網下，甚麼O2O、Online Offline，電貿網購平台之後，講聯繫人已經out晒，馬雲最唔啱聽，馬雲企業之最大目標就是滅亡聯繫人，阿里巴巴開設「無人超市」（比較貼地講法係無現場僱員超市），連售貨員收銀員都消滅掉，樣樣講求直接，日本人時興講「農場直送」，中間人過水濕腳（香港過去一百年賴以發達原因）嘅「聯繫人」角色已經步入黃昏，梁振英還要講「超級聯繫人」，得啖笑。
不過香港人、香港商人對一帶一路認識不足，對一路（東南亞、亞細安國家）或者因旅遊而識多啲，對一帶（新疆以西之中亞西亞，漢朝張騫之西域）就多數矇查查，故此半官方機構為了交功課，紛紛在港舉辦不同之論壇、研討會，介紹一帶一路。錢多人多嘅貿發局就最積極，除大力以中英文印製不同簡介、圖表、資料關於一帶一路外，還有一個HKTDC Belt and Road Portal，在網上向全世界提供一帶一路國家資料。下星期一，9月11日就主辦一個Belt and Road Summit（一帶一路商業論壇），出席演講嘉賓有邱騰華局長，行政會議成員查史美倫及陳智思，鄭若驊大律師，馮國經博士，馬時亨，倪以理，以及內地大型國企，東南亞大企業主席/總裁等等，預料到時出席論壇人數超過一千人。
咁大陣仗，外國人來港參加一帶一路論壇最後目的都係為咗搵銀，睇吓有冇商機啫，對香港嚟講，一般印象係中國國企行先，到一帶一路國家搞鐵路、公路、發電廠、供水廠等等基本建設，香港商人就向國企提供服務。銀行家出身嘅港鐵主席馬時亨聰明機靈，知道港鐵股東難以承受一帶國家投下大量投資資金，但以港鐵管理經營客運之成功經驗，大可從提供服務得益，例如假設中鐵建/中交建在彼邦建築鐵路，就可委託港鐵負責營運，港鐵用軟實力去賺取收益！港鐵既可在瑞典、墨爾本、雪梨管理當地之地下鐵路，獲得極佳聲譽，冇理由去一帶一路地區唔得嘅啫，其他香港商家相信亦可採用此方法向一帶一路進軍，但首先要學到馬時亨咁八面玲瓏至好講！