特首林鄭月娥噚日現身公務員事務局主辦嘅公務員優質服務獎勵計劃，發言時向公務員大笠高帽，其間更兩度自己讚自己。佢話要特別表揚3個部門，第一個係渠務處，大讚該署喺跑馬地遊樂場地底建造蓄洪池，暫存暴雨時過多雨水嘅工程係好有膽識同創新，不忘講笑自誇：「其中一樣值得表揚，因為我做發展局長時提出呢個項目。」惹來全場公務員大笑。
林鄭跟住就讚今年奪得「最佳公眾形象獎」金獎嘅消防員，特別讚賞消防員上月颱風期間喺飛鵝山救咗兩個內地男女，更讀出二人事後嘅公開信，話事件反映無論來自何方，生命都受尊重、安全都受保障，唔會區別相對，「呢個係一個國際化大都巿嘅泱泱風範」。
讚警隊實至名歸
而娥特提到民調評分一直包尾嘅香港警務處時，則話警隊獲得最佳公眾形象獎銀獎係「實至名歸」，話警務處都攞過3次銀獎：「換句話說，警務處係唔驚人抹黑嘅！」繼而話警務處未來想攞金獎好難，皆因消防處嘅金獎唔放畀人，其間不忘晒威水史：「我擔任社會福利署署長時，都係攞銀獎咋！」