邊位主席又剃人頭？之唔係僱員再培訓局（ERB）主席梁永祥囉。自從今年4月幫街坊飛髮後，唔知係技癢抑或愛上呢門手藝？梁主席噚日出席ERB美髮活動日時再次大顯身手；上次手震震嘅佢話，呢次相當有信心，唔知係咪進行咗秘密特訓？雖然剪前大叫緊張，但呢次就冇上次咁手震喇。
學員大讚好舒服
獲主席親自剪髮嘅ERB學員林新興，原來啱啱讀完兩個做麵包課程，對於主席嘅手勢，佢豎起兩隻拇指話：「好舒服，專業嚟講，有90分喇，但主席係業餘，就攞足100分。」認真識講嘢！佢又話課程幫到佢轉型投身飲食業，希望身體病好後可以做麵包師傅。
噚日其中一位義工Mary姐則專程由元朗到石籬幫街坊飛髮。本身兼職做形象設計嘅佢話讀完美髮課程後，最開心可以幫屋企人同老人家剪髮，仲話自己3個仔女都對佢手勢相當滿意，好耐無試過出去剪髮咯。
ERB嚟緊19號有按摩服務日，屆時有10位合資格學員幫100位入住安老院嘅老人家按摩，唔知主席到時會唔會又落場獻技呢？