每逢開鑼、農曆年、煞科呢啲日子，唔少平時唔睇開馬嘅市民，都會趁吓熱鬧入馬場，感受氣氛，但要留意其實馬場係危機處處嘅地方，一唔留神就好易發生意外。
近日英國馬場就差啲有人重傷，有位攝影師拎住部CAM，如常喺馬匹亮相圈，拍攝參戰馬動態，其中一駒見到人群，可能太緊張，突然之間失控起來，一腳兜嘢伸落Camman個頭度，好彩當時有部Cam擋住，如果畀呢條飛毛腿踢中，相信呢位仁兄有機會去賣咸鴨蛋。
雖然馬仔多數性格溫馴，但佢哋係一種天生細膽動物，見到人多環境，好多時會變荒失失奇兵，一緊張就會起飛腳，保護自己。
話說1995年澳門氹仔馬場，亦發生類似意外，肇事主角係練馬師邵融怡，佢就冇啱啱嗰位Camman咁好彩，當時邵融怡企喺欄邊，隔離沙地賽道有匹新馬行過，突然發難起飛腳，踢斷條欄，條鐵欄就直接擊中邵融怡頭部，結果搶救無效不治。所以馬迷去馬場真係要小心，贏輸都係其次，企遠啲睇馬平平安安離場先最重要，否則真係有錢都冇命享。